بایرام شهریارین حیدر باباسیندا

بایرام یئلی چارداخلاری یئخاندا

نوروز گولی،قار چیچکی چئخاندا

اغ بولودلار کوینکلرین سئخاندا

بیزده ن ده بیر یاد ائلیه ن ساغ اولسون

دردلریمیز قوی دیکلسون داغ اولسون

 

بایرامیدی گئجه قوشی اوخوردی

اداخلی قئز بی جورابئن توخوردی

هرکس شالئن بیر باجادان سوخوردی

ای نه گوزه ل قایدادی شال ساللاماق

بی شالئنا بایراملئقی باغلاماق

 

شال ایسته دیم منده ائوده اغلادئم

بیر شال الوب تئز بئلیمه باغلادئم

غلام گیله قاشدئم شالی ساللادئم

فاطما خالا منه جوراب باغلادی

خان ننه می یادا سالوب اغلادی

 

بایرام اولوب قئزل پالچئق ازه للر

ناقئش ووروب اتاقلاری بزه للر

طاخچالاردا دوزمه لری دوزه للر

قئز-گلینین فندقچاسی ،حناسی

هوسلنه ر اناسی قایناناسی

 

باکی چچنئن سوزی،سووی،کاغذی

اینکلرین بولاماسی ،اغزی

چرشنبه نین گردکانی مویزی

قئزلار دئیه ر :اتئل-باتئل چرشنبه

اینا تکین بختیم اچئل چرشنبه

 

یومورتانی گویچک،گوللی بویاردئق

چاقئشدوروب سئنانلارئن سویاردئق

اویناماقدان بیرجه مگر دویاردئق

علی منه یاشئل اشئق وئره ردی

ایرضا منه نوروز گولی ده ره ردی

/ 0 نظر / 18 بازدید